Content on this page requires a newer version of Adobe Flash Player.

Get Adobe Flash player

Գարակէօզեանի Բարեկենդանի խրախճանքը

        27 Փետրուար Չորեքշաբթի, Գարակէօզեան ընտանիքով տեղի ունեցաւ բարեկենդանի աւանդական խրախճանքը: Ուսուցչաց կազմը եւ աշակերտութիւնը վարժարան փութացին օրուան պատշաճ տարազներով, որոնցմով ստեղծուեցաւ տօնական մթնոլորտ մը: Վարժարանն ալ պատշաճօրէն յարդարուեցաւ այս խրախճանքին առթիւ:
        Նախ, առաւօտեան պարապմունքի ժամը տրամադրուեցաւ ներկայացման, որուն մէջ շեշտուեցաւ՝ Մեծ Պահքի, Բարեկենդանի եւ Վարդանանց Պատերազմի կարեւորութիւնը: Ապա, աշակերտները իրենց ուսուցիչներու հսկողութեամբ ուղղուեցան Նատիա-Տիգրան Կիւլմէզկիլ գեղարուեստական աշխատանոցներ, հոն մանկապարտէզի եւ նախակրդարանի աշակերտներու համար նախատեսուած էր զանազան զբաղումներ՝ ինչպէս մրմրաս (ակլատիս)ի պատրաստութիւն, Վարդանանց տօնի մասին շարականի եւ աշխարհիկ երգերու ուսուցում եւ հայկական պար: Մինչ այդ, միջնակարգի աշակերտները կուշտ ու կուռ զուարճացան մարզական խաղերով: Այս ընթացքը փոխուելով շարունակուեցաւ նախակրդարանի եւ միջնակարգի միջեւ:
        Շարժանկարի սրահին մէջ ցուցադրուեցաւ Յովհաննէս Թումանեանի՝ «Բարեկենդանը» գծաֆիլմը եւ աշխարհի տարբեր երկիրներու բարեկենդանի խրախճանքներէն դրուագներ:
        Խրախճանքի հաճելի բաժիններէն մէկն էր՝ տարազներով տողանցքը, որ տեղի տուաւ խանդավառ պահերու:
 
        Լուսանկարներ՝ Մկրտիչ Արծիւեան