Content on this page requires a newer version of Adobe Flash Player.

Get Adobe Flash player

Ոգեկոչեցինք Յովհաննէս Թումանեանի ծննդեան 150 ամեակը

        19 Փետրուար Երեքշաբթի, Յովհաննէս Թումանեանի ծննդեան 150 ամեակի յոբելեանի շրջագծով, Գարակէօզեան վարժարանի երդիքին տակ տեղի ունեցան շարք մը գործունէութիւններ:

        Այս ուղղութեամբ, առաւօտուն տեղի ունեցաւ սլայթի ցուցադրութիւն մը, որուն մէջ տեղ տրուած էր Թումանեանի ծննդավայրին, մանկութեան, աշակերտութեան տարիներու, ընտանեկան կեանքի, գրական վաստակի եւ երկերու մասին կարճ եւ յատկանշական տեղեկութիւններուն, իսկ խումբ մը աշակերտներ ցուցադրութեան ընթացքին հանդէս եկան արտասանելով Թումանեանէն քառեակներ:

        Միջնակարգի աշակերտներ, նախապէս կարդալով եւ ուսումնասիրելով Թումանեանի շարք մը հէքեաթները, ասոնցմէ «Քաջ Նազար»ն ու «Կիկոսի մահը» հէքեաթներուն համար գծումներ կատարելով վերարտադրեցին նոր կափարիչներ: Սոյն հէքեաթները նոր կափարիչներով վերածուեցան գրքոյկներու եւ օրուան մէջ միջնակարգի աշակերտները, այցելելով նախակրդարանի դասարանները՝ կարդալով, պատմելով ու մերթ հարցումներ ուղղելով փոքրերուն, ջանացին ծանօթացնել այս հէքեաթները: Ընթերցումներէն ետք, «19 Փետրուար՝ գիրք նուիրելու օր» շրջագծով այս գրքոյկները նուիրեցին նախակրդարանի բոլոր աշակերտներուն եւ կերպով մը աշակերտները առիթը ունեցան այս նշանակալից թուականին հետ ծանօթանալու:

        Իսկ 21 Փետրուար Հինգշաբթի «Միջազգային մայրենի լեզուի օր» շրջագծով, վարժարանիս Դ., Ե., Զ. եւ Է. դասարաններու միջեւ տեղի ունեցաւ «Թումանեանէն հէքեաթներ կարդալու մրցում» մը, որ այս մէկը ձօնուած էր Յովհաննէս Թումանեանին ծննդեան 150 ամեակին: Աշակերտները այս մրցումին մասնակցեցան, ուսումնասիրուած հէքեաթներէն բաժիններ ընտրելով, բացի ատկէ աշակերտները իրենց կարդալիք բաժինը զարդարեցին տեսողական առարկաներով, ինչպէս՝ անձնական գծումներով կամ համացանցէն գտնելով տեսանիւթեր:

        Մրցումը անցաւ ոգեւոր մթնոլորտի մէջ, աշակերտները ուշադրութեամբ հետեւեցան մրցումին:

        Այս առիթով ստեղծուեցաւ ոգեւոր մթնոլորտ մը, որով աշակերտները առիթը ունեցան մայրենի լեզուի օրուայ կապակցութեամբ անգամ մը եւս յիշատակել Յովհաննէս Թումանեանը եւ սրահին մէջ հնչեցուցին Թումանեանի անմահացած հէքեաթները: